MANIFEST PL: It-taxxa tal-boll tonqos minn 5% għal 1.5% fuq donazzjoni ta’ negozju bejn il-membri tal-familja F’konferenza tal-aħbarijiet indirizzata mill-Ministru għall-Finanzi, Clyde Caruana, u l-Ministru għall-Ġustizzja, Jonathan Attard, tħabbru żewġ proposti oħrajn mill-manifest elettorali Laburista ‘Int Malta’.Il-Ministru Attard ħabbar tnaqqis fit-taxxa tal-boll. “L-ewwel proposta n-negozji tal-familja li huma s-sinsla tal-ekonomija Maltija se nagħtuhom appoġġ akbar biex jgħaddu n-negozju minn ġenerazzjoni għall-oħra. Bil-għan li niffaċilitaw it-trasferiment tan-negozju, se nnaqqsu t-taxxa tal-boll b’mod permanenti minn 5% għal 1.5% fuq donazzjoni ta’ negozju bejn membri tal-familja. Fid-dawl li f’ċerti ċirkostanzi t-trasferiment tan-negozju jaf jieħu aktar żmien jew ma jilħaqx isir għax jiġi nieqes wieħed mill-ġenituri, se nibdew nirreġistraw id-donazzjoni fid-data li l-proċess ta’ trasferiment ikun beda.”