Il-benefiċċju fuq il-kera se jibda jonqos gradwalment fuq sentejn għal min ma jibqax eleġibbli Dalgħodu, il-Prim Ministru u Mexxej Laburista Robert Abela ħabbar sett ieħor ta’ miżuri b’rabta mal-housing u l-għajnuna socjali, bil-għan li persuni jkunu jistgħu javvanzaw mingħajr ma jitilfu l-appoġġ. Dan bħala parti mill-manifest elettorali tal-Partit Laburista, bit-tema "Int Malta – Il-Ħolma Tiegħek, il-Proġett Tagħna". Fost il-miżuri mħabbra se jkun hemm reviżjoni fl-iskema tal-benefiċċju tal-housing, relatata mas-sussidju fuq il-kirjiet. Ġie spjegat li dawk l-applikanti li wara r-reviżjoni ta’ dħul kull sentejn ma jibqgħux eliġibbli għall-iskema minħabba li d-dħul tagħhom ikun żdied aktar limitu stipulat, se jingħataw inċentiv ta’ tranżizzjoni biex ma jitilfux l-għajnuna minnufih.